عشان الفقير يعيش .. لازم الاسعار تزيد !!

قبل ما حد يعملى بلوك المعروف اعلاميا باسم بلوق بسبب العنوان ده ياريت تفهموا وجهة نظرى .. ولحظتها أظن إنكم سوف تعيشون الحلم ال جوايا .. ما سوف ارويه يحدث معى باستمرار .. هذه المرة حدث اثناء توجهى لباريس لتمثيل موقع و مجلة عالم السيارات لتغطية فعاليات معرض باريس الدولى للسيارات وتنقلى بين اكثر من عاصمة للوصول الى باريس 

 

الحكاية بتبدى معايا وانا فى مطار القاهرة .. على عكس كل الناس بزعل جداً لما المطار بيبقى فاضى .. والعكس اشعر  بغبطة شديدة عندما اشاهد مطار دبي او شارل ديجول او فرانكفورت ، بكين .... الخ مزدحم جدا . 

 

طوابير طويلة بعضها لولبي على كل شىء داخل وخارج المطار .. على مكاتب شركات الطيران ، على السوق الحرة ، على بوابات الدخول ، على سيارات الأجرة ، على مكاتب الصرافة .. كل دى مؤشرات لحجم التدفق السياحى . ومن ثم على قيمة العملة المحلية 

 

لكن الغبطة الكبرى التى اشعر بها وأكاد ان أتحول بسببها من مرحلة الغبطة الحميدة الى مرحلة الحقد الخبيث هو عندما ابحث عن فندق مناسب كنت أقيم فيه قبل عدة شهور او ايام واكتشف ان الاسعار زادت الى 3 او 4 أضعاف .. يا نهار اسود ليه ؟!! يا فندم عشان حضرتك حاجز فى نفس توقيت معرض كذا ومفيش نفس فى البلد !! 

 

يعنى مثلاً فى دبي هاتلاقى الاجندة محجوزة طول السنة وفى تنسيق مع هيئة تنشيط السياحة لإقامة المعارض المهمة فى الفترات الميتة فى السنة عشان يحافظ على مستوى معدلات النزلاء !!

فى الصين بكل مدنها الرئيسيّة مفيش يوم بيعدى فى السنة بدون وجود معرض وعلى رأسها طبعاً معرض كانتون فير فى مدينة جوانزو .. اكبر معرض فى العالم من حيث قاعات العرض وعدد الزائرين .. ومش الفنادق بس ال سعرها بيرتفع ده كل موضع قدم فى جوانزو أسعاره بترتفع بسبب كانتون فير !!

 

اما احفاد نابليون فلا مفر من الحقد عليهم ليس بسبب التدفق السياحى فحسب ولكن بسبب نوعية السائح من حيث القدرة المادية نتيجة نوعية المعارض المنظمة من جانبهم .. ومن حظى السىء هذه المرة ان معرض باريس الدولى السيارات يواكب معرض عالمى فى الفاشون .. يعنى الاسعار حاجة كدة ولا اوسخ .. وطبعاً الجنيه المسكين هايروح فين ويعمل ايه ؟ 

 

عشان كدة باحلم باليوم الذى ارى فيه بوستات تماثل هذا البوست من الفرنسيين والانجليز يرفعون يديهم للسماء كى يرحمهم رب العالمين من ارتفاع اسعار الفنادق فى مصر..  بسبب تزامن زيارتهم مع معرض دولى ضخم ينظم فى مصر  او بسبب بطولة رياضية يتم تنظيمها فى مصر او معرض للأثاث الدمياطي .... مش لازم نعتمد على ميراث الاجداد من الاثار او على حلاوة شمسنا والجو جميل طول السنة .. عشان نستقطب السائح  . وما اشير اليه ليس المفصود به زيادة فى اسعر الفنادق بشكل مطلق .. ولكن اقصد ان نجبر رجال الاعمال والمستثمرين على الحضور الى مصر بهدف حضور معارض قوية وبالتالى سوف تزيد الاسعار تلقائيا وينعكس الامر على الاقتصاد المصرى بشكل عام